Kryetari i AAK-së, Ramush Haradinaj, ka publikuar një mesazh të gjatë dhe emocional kushtuar mërgatës shqiptare, duke vlerësuar kontributin e tyre historik në ruajtjen e identitetit dhe zhvillimin e vendit.
Haradinaj theksoi se malli dhe dashuria e mërgimtarëve për Kosovën kanë qenë gjithmonë të pranishme, pavarësisht distancës dhe vështirësive të jetës jashtë vendit. Ai kujtoi se ky rrugëtim nuk fillon sot, por ka një shekull histori, duke kaluar nga gjyshërit, te babai, te i biri e deri te brezat e rinj që sot rriten me kujtimin e vendlindjes.
Në mesazhin e tij, Haradinaj rikujtoi periudhën e vështirë të mërgimtarëve në Evropë, përfshirë punët e rënda, jetesën në podrume e banesa të ngushta, si dhe mallit që dëgjohej vetëm përmes telefonatave të rralla të asaj kohe. Ai nënvizoi se shumë prej tyre, përveç punës për mirëqenien e familjes, morën rrugën e luftës për lirinë e Kosovës, duke u bërë pjesë e sakrificës kombëtare dhe duke dhënë edhe jetën për vendin.
Sipas Haradinajt, mërgimi shqiptar nuk është thjesht histori largimi, por histori sakrifice, identiteti dhe lidhjeje të pandashme me atdheun. Ai u shpreh se Kosova vazhdon të ketë nevojë për zërin, besimin dhe angazhimin e mërgatës, duke i falënderuar të gjitha brezat që ruajtën gjuhën, traditat dhe lidhjen me vendlindjen.
“Ju e doni Kosovën më shumë sesa mund ta tregojnë fjalët”, u shpreh Haradinaj në përmbyllje të mesazhit të tij, duke theksuar se çdo hap i vendit drejt përparimit është edhe meritë e tyre.