Ish-kryeministri i Kosovës, Avdullah Hoti, ka reaguar pas njoftimit të Bashkimit Evropian se masat ndaj Kosovës kanë hyrë në fuqi.
Sipas ish-kryeministrit Hoti, Qeveria nuk e ka njoftuar as Kuvendin e as qytetarët lidhur me këtë situatë.
Ai madje thotë se duhet mbajtur seancë të jashtëzakonshme të Kuvendit për të diskutuar dhe dakorduar kursin e veprimeve ndaj këtyre masave.
“Ku është Presidentja e vendit? Pse nuk po e ushtron funksionin e saj? Ky binom po e çojnë Kosovën në një rrugë tjetër, jo në atë të perëndimit” ka thënë mes të tjerash Hoti.
Ky është reagimi i plotë i tij:
Më 28 qershor 2023, BE e paska njoftuar Qeverinë e Kosovës për sanksionet e vendosura: suspendimi i MSA-së, suspendimi i projekteve që financohen nga Korniza Investuese për Ballkanin Perëndimor, pezullimi i fondeve të IPA, pezullimi i takimeve të larta dy palëshe dhe masa të tjera.
Qeveria e Kosovës nuk e ka njoftuar as Kuvendin e Kosovës dhe as qytetarët për këtë situatë të re.
Kuvendi duhet të mblidhet në seancë të jashtëzakonshme për të diskutuar dhe për tu dakorduar për kursin e veprimeve.
Ku është Presidentja e vendit? Pse nuk po e ushtron funksionin e saj? Ky binom po e çojnë Kosovën në një rrugë tjetër, jo në atë të perëndimit.
Një gjë është e qartë: Kosova nuk mund të udhëhiqet nga një Kryeministër dhe Presidente, të cilët i sjellin vendit sanksione në vend të integrimit euro-atlantik.