Një vit pas ndërtimit të ambulancës së re në fshatin Duhël, banorët po përballen me mungesën e kushteve elementare për funksionim. Sipas kandidatit për Asamblenë Komunale nga LDK, Ilir Përteshi, objekti që duhej të përmirësonte shërbimet shëndetësore është kthyer në shembull të keqmenaxhimit dhe neglizhencës komunale.
“Ambulanca e re në Duhël nuk ka ujë fare – as të pijshëm, as për përdorim të zakonshëm. Për turp, ujin e merr nga një restorant privat afër. Edhe më keq, ambulanca e vjetër kishte ujë dhe stomatolog, ndërsa kjo e reja, që duhej të ishte përmirësim, është bërë shembull i neglizhencës së komunës,” – theksoi Përteshi në reagimin e tij publik.
Ky objekt, që shërben për banorët e Duhlës, Bllacës, Javorit, Luzhëvicës, Grajçevcit, Qadrakut dhe Dragaqinës, është ndërtuar me qëllimin për të ofruar shërbime më të mira mjekësore, por në praktikë ka mbetur gjysmëfunksional. Mungesa e ujit dhe e shërbimeve bazike si stomatologjia po e bën të pamundur ofrimin e kujdesit cilësor për banorët e zonës.
Përteshi ka kritikuar ashpër qeverisjen aktuale komunale, duke theksuar se “zgjidhja ka qenë e mundur, por neglizhenca e madhe e ka bllokuar këtë shërbim të rëndësishëm për qytetarët”. Ai ka shtuar se prioriteti i pushtetit duhet të jetë përmirësimi i kushteve të qytetarëve dhe jo reklamat në rrjete sociale.
“Kryetari aktual duhet të merret më shumë me nevojat e qytetarëve sesa me postimet në Facebook,” – ka shtuar Përteshi, duke kërkuar një qasje më serioze ndaj shërbimeve shëndetësore në fshatra.