Qytetarët e Suharekës po përballen me mungesë të energjisë elektrike që nga orët e para të mëngjesit të sotëm, ndërsa ndërprerja ka zgjatur rreth 8 orë pa asnjë sqarim të plotë nga furnizuesi.

Banorët raportojnë se linjat telefonike të KESCO-s nuk janë përgjigjur, ndërsa shumë prej tyre thonë se kanë mbetur krejtësisht të painformuar për situatën dhe kohën e rikthimit të rrymës.

I vetmi njoftim zyrtar i paraqitur deri tani është ai në aplikacionin e KESCO-s, ku thuhet:

“Ndërprerje të energjisë në daljen ‘J07 Theranda 2-32000026’ prej 18/11/2025, ora 03:57 – arsyeja e ndaljes është: KOSTT.”

Ky njoftim nuk përfshin asnjë afat rikthimi dhe as detaje rreth defektit, duke lënë qytetarët në pasiguri totale.

Rikthimi i energjisë mund të ndodhë pas orës 14:00

Sipas burimeve të Suhareka Express — jo nga kanalet zyrtare, por nga lexues të cilët kanë arritur të kontaktojnë KESCO-n — është thënë se pas orës 14:00 pritet rikthimi i energjisë elektrike në Suharekë.

Ky informacion mbetet i pakonfirmuar zyrtarisht, por është deri tani e vetmja orë e përfolur për normalizim.

Qytetarët thonë se mungesa e informimit ka krijuar shqetësim të madh, sidomos për bizneset, institucionet dhe familjet që varen nga pajisjet elektrike.

SuharekaExpress do të raportojë për çdo zhvillim të ri sapo të bëhet i ditur.