Suharekë, 6 gusht 2025 — Kryetari i Komunës së Suharekës, Bali Muharremaj, ka bërë një thirrje publike për pjesëmarrje në protestën gjithëpopullore që organizohet nga kategoritë e dala nga lufta e Ushtrisë Çlirimtare të Kosovës. Në një postim zyrtar, ai ka shprehur mbështetje të plotë për këtë organizim, duke theksuar rëndësinë e bashkimit qytetar në mbrojtje të vlerave të luftës çlirimtare.
“Në emër të Komunës së Suharekës dhe si Kryetar i saj, u bëj thirrje të gjithë qytetarëve, që të bashkohen në protestën gjithëpopullore kundër padrejtësisë,” ka deklaruar Muharremaj.
Ai ka nënvizuar se protesta është një reagim i domosdoshëm ndaj padrejtësive që po u bëhen pjesëtarëve të luftës, të cilët, sipas tij, kanë dhënë gjithçka për lirinë e vendit.
“Duhet të mbetet zëri ynë i përbashkët për të mbrojtur të vërtetën e luftës sonë çlirimtare dhe për të kundërshtuar çdo padrejtësi që po u bëhet atyre që dhanë gjithçka për lirinë e Kosovës,” thuhet në deklaratën e tij.
Thirrja e Muharremajt vjen në një kohë kur shqetësimet për trajtimin e ish-pjesëtarëve të UÇK-së dhe proceseve gjyqësore ndaj tyre janë shtuar në opinionin publik, duke nxitur reagime nga qytetarët, organizatat e dala nga lufta dhe përfaqësues politikë në nivel lokal dhe qendror.
Protesta synon të shndërrohet në një zë të fuqishëm popullor për të mbrojtur historinë dhe dinjitetin e atyre që kontribuuan në lirinë e Kosovës, dhe për të kërkuar drejtësi e dinjitet për të gjithë ata që u flijuan për vendin.