Kryetari i Komunës së Suharekës, Bali Muharremaj, ka reaguar pas lajmit për ndarjen nga jeta të Dr. Salih Bytyqit, duke e cilësuar atë si një personalitet të shquar të shëndetësisë dhe një atdhetar të devotshëm.
Në një postim në Facebook, Muharremaj ka shkruar se Dr. Bytyqi ishte mjek i nderuar, humanist, veprimtar politik dhe pjesëtar i Ushtrisë Çlirimtare të Kosovës, i cili me përkushtimin e tij ka lënë gjurmë të pashlyeshme në shërbim të qytetarëve dhe kombit.
“Kontributi i tij i çmuar për qytetarët e Komunës së Suharekës dhe për kombin tonë, do të mbetet përherë në kujtesën e gjeneratave,” ka thënë kryetari Muharremaj.
Ai ka bërë të ditur se nën patronatin e Komunës së Suharekës, nesër do të mbahet mbledhja komemorative nga ora 14:00 në Shtëpinë e Kulturës “Afërdita” në Mushtisht, ndërsa nga ora 15:00 do të zhvillohet ceremonia e varrimit.
“Ngushëllime më të sinqerta familjes Bytyqi, kolegëve dhe gjithë qytetarëve që humbën një njeri të madh. Kujtimi dhe vepra e tij do të jetojnë gjithmonë me ne,” ka përfunduar ai.