Kryeministri në detyrë, Albin Kurti, ka bërë thirrje për kujdes të shtuar në trafik, duke paralajmëruar se nata e sotme paraqet rrezik serioz për qarkullimin në rrugët e Kosovës, si pasojë e uljes së theksuar të temperaturave.
Sipas Kurtit, kontrasti i madh i temperaturave, me parashikime që ato të zbresin deri në –9°C, mund të shkaktojë ngrirje të rrugëve që kanë qenë të lagura nga reshjet e shiut, duke rritur rrezikun për aksidente.
“Të gjitha kompanitë e mirëmbajtjes së rrugëve janë vazhdimisht në terren për të lehtësuar qarkullimin,” ka theksuar Kurti, duke shtuar se zbatimi i ligjit për sezonin dimëror është i domosdoshëm, veçanërisht pajisja e automjeteve me goma dimërore dhe zinxhirë.
Ai u ka bërë thirrje qytetarëve që të shmangin lëvizjet e panevojshme gjatë natës, ndërsa ata që janë të detyruar të qarkullojnë, të vozisin me kujdes të shtuar dhe t’u përshtaten kushteve atmosferike.
“Ne po bëjmë maksimumin për t’ju dalë në ndihmë, andaj ju lutemi të kontribuoni në rritjen e sigurisë duke shmangur lëvizjet e panevojshme,” ka cituar Kurti në apelin e tij drejtuar qytetarëve.
Autoritetet vazhdojnë të monitorojnë situatën në terren, ndërsa qytetarëve u rekomandohet vigjilencë e lartë për të shmangur rreziqet gjatë qarkullimit.