Kryetari i Lidhjes Demokratike të Kosovës, Lumir Abdixhiku, i është përgjigjur kryeministrit në detyrë Albin Kurti, pas deklaratës së këtij të fundit se ishte i “çuditur” me refuzimin e LDK-së për bashkëpunim.
Abdixhiku theksoi se Kurti nuk i kupton parimet, fjalën e dhënë dhe dinjitetin politik, duke e akuzuar për bllokim të shtetit, shkelje të Kushtetutës dhe përçarje të vazhdueshme të skenës politike.
“Jam i bindur se parimet nuk i kupton. Fjalën e dhënë edhe më pak,” ka thënë Abdixhiku, duke shtuar se kryeministri në detyrë ka bllokuar për muaj të tërë funksionimin e institucioneve, ka uzurpuar pushtetin dhe ka shkelur Kushtetutën në mënyrë të përsëritur.
Ai e ka akuzuar Kurtin se nuk respekton gjykatat e Republikës, mbron të korruptuarit partiakë dhe përdor fjalor përçarës ndaj kundërshtarëve politikë.
“Një njeri që nuk e kupton bashkëpunimin, unitetin dhe afrimin si akt patriotik, që ofendon e izolon vendin e vet, nuk mund të kuptojë as çfarë do të thotë dinjitet në politikë,” ka theksuar Abdixhiku.
Kreu i LDK-së tha se partia që ai udhëheq ecën në rrugën e saj, me parime dhe me besim në Republikën që vetë e ka ndërtuar.
“LDK-në mund ta sulmoni, mund edhe ta ofendoni – por vetëm kaq keni mundësi. LDK po ecë drejtë, në rrugën e vet, për vete dhe për Republikën që e krijoi vet,” u shpreh ai.
Në përfundim, Abdixhiku përsëriti mesazhin që simbolizon qëndrueshmërinë e partisë:
“LDK dje, LDK sot, LDK përgjithmonë. Dritë do të ketë.”