Kryeministri i Kosovës, Albin Kurti, ka deklaruar se nëna e fëmija, bujqësia, veriu dhe ushtria kanë qenë kryefjalët e mandatit aktual qeveritar, duke theksuar se politika duhet të matet me vepra dhe jo me justifikime.
Në një postim të publikuar pas tubimit të mbajtur sot në Suharekë, Kurti ka renditur disa nga arritjet kryesore të qeverisë së tij, përfshirë rritjen e kapaciteteve të ushtrisë përmes shumëfishimit të armatimit, mbështetjen prej rreth 300 milionë eurosh për mbi 120 mijë fermerë, si dhe vendosjen e rendit dhe ligjit në veri të vendit.
Ai po ashtu ka përmendur përkrahjen financiare për herë të parë për fëmijët dhe nënat lehona, si një nga politikat sociale kryesore të këtij mandati.
Duke folur për mandatin e ardhshëm, Kurti ka paralajmëruar investime të mëdha, përfshirë 1 miliard euro për prodhuesit vendor, 1 miliard euro për ushtrinë dhe 1 miliard euro në vit për investime kapitale, si dhe dyfishim të shtesave për fëmijë dhe rritje të mbështetjes për nënat lehona.
Sa i përket Suharekës, Kurti ka njoftuar se është planifikuar ndërtimi i digës së liqenit akumulues të Dragaçinës, projekt që synon të sigurojë ujë të pijshëm cilësor për qytetin dhe fshatrat përreth, duke përfshirë edhe Samadraxhën, si dhe ujë për bujqësi dhe industri.
“Siguri dhe begati për Suharekën dhe për krejt Kosovën”, ka përfunduar Kurti mesazhin e tij, duke përsëritur thirrjen politike: “Mos lësho pe!”.