Kryeministri në detyrë i Kosovës, Albin Kurti, ka folur hapur për situatën politike dhe procesin e formimit të qeverisë së re, gjatë një tubimi me diasporën shqiptare në Londër. Ai shprehu dyshime se do të mund ta formojë qeverinë deri të dielën, që është edhe afati i fundit kushtetues për këtë proces.
Kurti tha se përpjekjet për të arritur marrëveshje mes subjekteve politike po përballen me pengesa të shumta, duke e cilësuar atmosferën aktuale si “të helmuar” dhe të mbushur me “xhelozi e inate”.
“Do të përpiqemi maksimalisht që deri të dielën ta bëjmë qeverinë. Të hënën nuk mundemi me u përgatit, sepse ose e kemi bërë qeverinë ose jo. Nuk është kollaj, është intoksuar atmosfera shumë, ka shumë xhelozi, inat e cinizëm – shumë më shumë se ide, punë e pasion,” deklaroi ai.
Sipas Kurtit, në rast se nuk arrihet formimi i qeverisë, alternativa e vetme do të jenë zgjedhjet e reja. Ai shtoi se partitë që deri tani kanë qenë në opozitë nuk po tregojnë vullnet për të kontribuar në ndërtimin e një shumice të re parlamentare.
“Ose do ta bëjmë qeverinë, ose shkojmë në zgjedhje. Nuk po duket që opozita ka vullnet dhe as synim për qeveri të tyre,” u shpreh Kurti.
Deklaratat e tij vijnë në një moment vendimtar për skenën politike në Kosovë, teksa afati për formimin e qeverisë së re po afron dhe negociatat ndërmjet subjekteve politike mbeten pa rezultat konkret.