Që të dy partitë si LDK ashtu edhe PDK si duket po garojnë për profesionistë të fushës së sigurisë! Ish komandanti i Policisë së Kosovës Rashit Qalaj dha dorëheqje nga policia për t’ iu bashkuar Partisë Demokratike të Kosovës. Në anën tjetër Lidhja Demokratike e Kosovës ka futur në listën për deputet Mirsad Sylejmanin, ish hetues në Departamentin e Hetimeve Speciale të Policisë së Kosovës.
Rashit Qalaj, Drejtor i Përgjithshëm i Policisë së Kosovë i cili u shkarkua nga Kryeministri Avdullah Hoti, pati bërë një ankesë për shkarkim të paligjshëm por nuk vonoi shumë dhe iu bashkua Partisë Demokratike të Kosovës, ku kjo e fundit e futi në listën për deputet.
Ndërkohë, Mirsad Sylejmani i cili është jurist i fushës penale, ka qenë një nga hetuesit e dalluar të Njësive të specializuara, siç është Drejtoria Kundër Krimit të Organizuar ndërsa së fundmi, para se të largohet nga Policia e Kosovës, shërbeu në Departamentin Special Kundër Korrupsionit.
Mirsad Sylejmani është kandidat për deputet me numër 70 në listën e LDK-së, kurse Rashit Qalajt i është besuar numri 13 në listën e kandidatëve për deputet të PDK-së.
Neve na mbetet të presim përfundimin e zgjedhjeve dhe të shohim nëse pas datës 14 shkurt, këta dy ish zyrtarë policorë do të bëhen pjesë e Kuvendit të Kosovës.