Kandidati i Lidhjes Demokratike të Kosovës për kryetar të Suharekës, Ardian Shala, e ka prezantuar planprogramin e tij me të cilin synon marrjen e pushtetit në këtë komunë.

Shala tha se me vizionin e tyre, Suharekën e shohin të zhvilluar dhe se do ta kthejnë këtë komunë në qendër kryesore të rajonit për ekonomi, arsim e kulturë.

“Brenda shtyllës së arsimit, do të fillojmë me mësimin tërë-ditor, ndërtimin e një shkolle të re, përfundimin e punimeve në dy shkolla të tjera në Samadraxhë dhe në Vraniq. Pajisje me kabinete për IT, kabinete të kimisë dhe shkencave natyrore, tabela të mençura”.

Po ashtu, në rini e sport do ta themelojmë teatrin e qytetit, rifunksionalizimin e muzeut, do t’i subvencionojmë klubet sportive, aktivitetet rinore. Do ta ndërtojmë palestrën dhe pishinën me standarde olimpike”, tha Shala në Edicionin Special në Klan Kosova.

Tutje, ai premtoi se do të ndërtojnë një QKMF të re dhe do t’i funksionalizojnë të gjitha ambulantat që janë në fshatra, por edhe ndërtimin e një administrate të re në fshatin Nishor.

“Në administratë do të ndërtojmë një objekt komunal të ri, me hapësira të përshtatshme për shërbime sa më funksionale që qytetarët të ndihen mirë”, tha ai.