Sipas burimeve të Suhareka Express, lëvizjet politike në prag të zgjedhjeve të 28 dhjetorit po intensifikohen, dhe njëri prej zhvillimeve më të mëdha pritet të ndodhë këtë fundjavë. Mësohet se Fatmir Limaj, kryetar i NISMËS Socialdemokrate, është shumë afër zyrtarizimit të kalimit në Partinë Demokratike të Kosovës (PDK).
Sipas informacioneve të siguruara, marrëveshja tashmë konsiderohet punë e kryer, ndërsa zyrtarizimi pritet të ndodhë të dielën. Limaj, sipas të njëjtave burime, do të marrë postin e nënkryetarit të PDK-së.
Deri më tani qarkullonin zëra se NISMA mund të hynte në koalicion me Lidhjen Demokratike të Kosovës (LDK) për zgjedhjet e parakohshme parlamentare të 28 dhjetorit. Megjithatë, duket se zhvillimet e orëve të fundit kanë sjellë ndryshime të mëdha në skenën politike.
Mbetet të shihet se çfarë do të sjellë e diela dhe si do të konfigurohet skena politike në ditët që vijnë, por një gjë është e sigurt: ndryshimet dhe lëvizjet e reja janë të pashmangshme ndërsa vendi i afrohet fushatës zgjedhore.