Kryetari i Komunës së Suharekës, Bali Muharremaj, ka prezantuar një tjetër kandidate të Aleancës për Ardhmërinë e Kosovës (AAK) për Asamblenë Komunale në zgjedhjet e ardhshme lokale. Luljeta Berisha, me profesion pedagoge dhe me banim në Suharekë, vjen në këtë garë me një vizion të qartë dhe përkushtim të palëkundur ndaj arsimit dhe zhvillimit të komunitetit.
E njohur për angazhimin e saj në çështje arsimore dhe sociale, Berisha synon të jetë zëri i qytetarëve në institucionet komunale, duke përfaqësuar me dinjitet nevojat e komunitetit dhe sidomos fushat që lidhen me arsim më cilësor, barazi dhe transparencë në vendimmarrje.
“Me përvojë dhe vizion për përmirësimin e jetës në komunën tonë, ajo angazhohet të jetë përfaqësuese aktive e qytetarëve,” thuhet në prezantimin e bërë nga kryetari Muharremaj.
Kandidatura e saj konsiderohet si një vlerë e shtuar për listën e AAK-së në Suharekë, duke ofruar një kombinim të dijes pedagogjike dhe ndjeshmërisë sociale, në funksion të ndërtimit të një komune më të drejtë dhe më të orientuar nga nevojat e qytetarëve.
