Kryetari i Lidhjes Demokratike të Kosovës, Lumir Abdixhiku, ka njoftuar sot aderimin e Ermal Sadikut në LDK, një prej figurave më të njohura të inxhinierisë, inovacionit dhe sipërmarrjes teknologjike në vend.
Në postimin e tij, Abdixhiku e ka cilësuar Sadikun si një profesionist të përgatitur dhe një prej kontribuuesve kryesorë në zhvillimin e sektorit të teknologjisë në Kosovë.
Ermal Sadiku, i lindur dhe rritur në Prishtinë, është dalluar në studimet e tij në vend dhe jashtë tij, duke vijuar specializimet në Gjermani dhe duke ndërtuar një karrierë që e ka pozicionuar në mesin e ekspertëve më të respektuar në fushën e ICT-së. Pas kthimit në Kosovë, ai ka themeluar disa kompani të suksesshme teknologjike dhe ka krijuar vende pune me standarde ndërkombëtare.
Sadiku ka qenë gjithashtu ligjërues universitar, si dhe kryetar i Bordit të STIKK, ku ka ndihmuar në hartimin e politikave dhe strategjive për zhvillimin e ekosistemit teknologjik në vend. Përmes mentorimit dhe angazhimit të tij, ai është bërë një prej figurave që kanë formësuar breza të tërë të rinjsh në fushën e inovacionit.
Në reagimin e tij, Abdixhiku ka theksuar se aderimi i Sadikut përbën forcim për LDK-në, duke shtuar se partia mbetet e hapur për profesionistë dhe individë me integritet që duan të kontribuojnë në zhvillimin e vendit.
Sipas Abdixhikut, ardhja e Sadikut është një sinjal i qartë se LDK-ja po tërheq figura me ndikim dhe ekspertizë, ndërsa partia po synon të ndërtojë një ofertë të re politike të mbështetur në profesionalizëm dhe vizion zhvillimor.