Kryeministri në detyrë dhe kryetari i Lëvizjes Vetëvendosje, Albin Kurti, ka deklaruar se formimi i qeverisë së re pritet të ndodhë shpejt, menjëherë pas certifikimit të rezultateve përfundimtare të zgjedhjeve parlamentare të 28 dhjetorit nga Komisioni Qendror i Zgjedhjeve.
Në një intervistë për KosovaPress, Kurti ka theksuar se prioritetet e para institucionale janë të qarta: konstituimi i Kuvendit të legjislaturës së dhjetë, zgjedhja e kryesisë së Kuvendit dhe formimi i qeverisë së re. Vendimi më i rëndësishëm në fillim të mandatit, sipas tij, do të jetë miratimi i buxhetit për vitin 2026.
Kurti ka bërë të ditur se bashkëpunimi me partitë e tjera politike do të shihet shumë shpejt, sidomos për shkak të marrëveshjeve ndërkombëtare urgjente që kërkojnë votim në Kuvend. Ai ka përmendur në veçanti Planin e Rritjes së Bashkimit Evropian, nga i cili Kosova pritet të përfitojë rreth 880 milionë euro, si dhe 90 milionë euro mbështetje buxhetore nga Banka Botërore, fonde për ndërtimin e çerdheve dhe për sistemin informativ shëndetësor.
Sa i përket përbërjes së kabinetit të ri qeveritar, Kurti ka theksuar se nuk priten ndryshime të mëdha, por do të ketë konsultime të reja brenda Lëvizjes Vetëvendosje dhe me partnerët e koalicionit, duke marrë parasysh edhe rezultatin individual të deputetëve. Ai ka sqaruar se formimi i ekipit qeveritar nuk bazohet vetëm në numrin e votave, por edhe në përvojën, rolin dhe nevojat institucionale.
Duke folur për çështjen e Presidentit të Republikës, Kurti ka deklaruar se kjo temë vjen vetëm pasi të përfundojnë tre hapa të rëndësishëm: konstituimi i Kuvendit, formimi i qeverisë dhe miratimi i buxhetit. Ai ka theksuar se për zgjedhjen e Presidentit nevojiten 80 deputetë në sallë, çka e bën procesin të vështirë dhe të pamundur pa përfshirjen e opozitës.
Kurti ka bërë të ditur se planifikon një takim me Presidenten aktuale Vjosa Osmani për të diskutuar shanset dhe mundësitë përpara, por ka theksuar se aktualisht nuk është e drejtë të flitet për emra të tjerë “konsensualë” pa u përmbyllur hapat e parë institucionalë.
Ai nuk e ka përjashtuar as mundësinë e zgjedhjeve të reja, duke thënë se ekzistojnë rrethana teorike dhe praktike që mund ta çojnë vendin në një proces të ri zgjedhor, nëse nuk sigurohet konsensus për çështjet kyçe.
Sa i përket bashkëqeverisjes, Kurti ka theksuar se prioritet do t’u jepet partive të komuniteteve jo-shumicë, jo-serbe, me të cilat Vetëvendosje ka bashkëpunuar edhe në legjislaturat e kaluara, ndërsa bashkëpunimi me partitë tjera opozitare mbetet i hapur, por i vështirësuar nga zhvillimet politike gjatë vitit 2025.
Sipas Kurtit, vonesat aktuale në formimin e institucioneve lidhen vetëm me procesin e numërimit të votave dhe certifikimin e rezultateve, ndërsa sa i përket formimit të qeverisë, ai ka siguruar se nuk do të ketë asnjë pengesë për një krijim të shpejtë të saj.