Republika e Maqedonisë së Veriut ka vendosur që nga 12 tetori të hapë kufirin me Republikën e Kosovës dhe për udhëtimet drejt Shkupit s’do të jetë i nevojshëm testi PCR, shkruan Gazeta Express.
Një gjë të tillë e ka konfirmuar në profilin e tij zyrtar në ‘Facebook’, ministri i Zhvillimit Ekonomik në Qeverinë maqedonase, Kreshnik Bekteshi.
“Nga 12 Tetori kafe në Prishtinë pa PCR!”, ka shkruar Bekteshi, raporton Gazeta Express.
Edhe zëvendëskryeministri Artan Grubi ka thënë se Maqedonia e Veriut nga 12 tetori po i hap kufijtë me fqinjët.
“Po i hapim kufijtë me fqinjët, nga 12 tetori”, ka shkruar Grubi.
Ky vendim i autoriteteve maqedonase vjen pasi situata pandemike në Kosovë ka shkuar drejt normalizimit dhe për gati një muaj numri i rasteve të reja pothuajse është trefish më i vogël se rastet e shëruara. /Express/