Me pikëllim të thellë, Komuna e Suharekës ka bërë të ditur ndarjen nga jeta të Dr. Salih Bytyqit – një personalitet i shquar i shëndetësisë, humanist, veprimtar politik, atdhetar i devotshëm dhe pjesëtar i Ushtrisë Çlirimtare të Kosovës.
Kontributi i tij i çmuar për qytetarët e Suharekës dhe për kombin do të mbetet përgjithmonë në kujtesën e gjeneratave, si shembull i përkushtimit profesional dhe atdhedashurisë.
Nën patronatin e kryetarit Bali Muharremaj dhe Komunës së Suharekës, nesër do të mbahet mbledhja komemorative për nder të jetës dhe veprës së Dr. Bytyqit. Ajo do të zhvillohet në ora 14:00 në Shtëpinë e Kulturës “Afërdita” në Mushtisht, ndërsa në ora 15:00 do të mbahet ceremonia e varrimit.
Kryetari Muharremaj, në emër të institucionit komunal, ka shprehur ngushëllime të sinqerta për familjen Bytyqi, kolegët e shumtë dhe gjithë qytetarët që humbën një njeri të madh, duke theksuar se kujtimi dhe vepra e Dr. Salih Bytyqit do të jetojnë gjithmonë me ne.