Kryeministri i Kosovës, Albin Kurti, ka emëruar Arlind Manxhukën në pozitën e Zëdhënësit të Qeverisë së Republikës së Kosovës, duke e zhvendosur atë nga roli i mëparshëm partiak në një funksion shtetëror brenda Zyrës së Kryeministrit.
Manxhuka, i cili deri më tani ka shërbyer si Këshilltar Politik i Kryeministrit dhe më herët si zëdhënës i Lëvizjes Vetëvendosje, tashmë do të ushtrojë detyrën e Zëdhënësit të Qeverisë, në bazë të vendimit të nënshkruar nga kryeministri.
Në vendim thuhet se ai do të përmbushë detyrat dhe përgjegjësitë e përcaktuara me Ligjin për Qeverinë e Republikës së Kosovës, si dhe detyra të tjera shtesë të caktuara nga Kryeministri. Po ashtu, si zyrtar i lartë publik, ai obligohet të bëjë deklarimin e pasurisë në përputhje me legjislacionin në fuqi.
Emërimi i Manxhukës në këtë pozitë shihet si një hap i ri në karrierën e tij politike dhe institucionale. Ai njihet për paraqitjet e tij të shpeshta publike dhe mbrojtjen e qëndrimeve të Lëvizjes Vetëvendosje dhe të kryeministrit Kurti.
Marrëdhënia e tij e punës përfundon me mbarimin e mandatit të Kryeministrit, nëse emërimi nuk ndërpritet më herët.