Avdullah Hoti kërkon unitet dhe reformim të thellë në LDK, paralajmëron dorëheqje nga organet drejtuese
Deputeti dhe ish-kryeministri i Kosovës, Avdullah Hoti, njëherësh anëtar i Kryesisë së Lidhjes Demokratike të Kosovës, ka reaguar publikisht lidhur me situatën e brendshme në LDK pas rezultatit të zgjedhjeve parlamentare të 28 dhjetorit 2025, duke bërë thirrje për unitet, reflektim dhe respektim strikt të statutit të partisë.
Hoti ka theksuar se LDK ndodhet në një moment të ndjeshëm dhe se askush nga ata që mbajnë përgjegjësi politike nuk duhet të qëndrojë anash proceseve vendimtare për të ardhmen e partisë. Sipas tij, vetëm përmes qetësisë, pjekurisë politike dhe gjithëpërfshirjes mund të rikthehet besimi i qytetarëve dhe LDK-ja të vihet sërish në shërbim të Kosovës.
Ai ka rikujtuar se Statuti i LDK-së është i qartë sa i përket procedurës në rast të dorëheqjes së kryetarit të partisë, duke theksuar se Kuvendi i LDK-së duhet të thirret për t’u njoftuar zyrtarisht për dorëheqjen dhe më pas për të zgjedhur kryetarin e ri. Çdo devijim nga kjo procedurë, sipas Hotit, përbën përpjekje për shtyrje ose deformim të përgjegjësisë politike.
Duke iu referuar standardit të vendosur pas zgjedhjeve të vitit 2021, Hoti ka deklaruar se dorëheqja pas një rezultati të dobët zgjedhor është parim që është promovuar edhe nga vetë lidershipi aktual i LDK-së, andaj shmangia e tij sot do të ishte në kundërshtim me vlerat e shpallura.
Ai ka vlerësuar se rezultati i zgjedhjeve të 28 dhjetorit 2025 ishte tejet i dobët dhe se LDK-së i nevojitet lidership i ri, si dhe një riorganizim i plotë në të gjitha nivelet përmes një procesi transparent dhe gjithëpërfshirës. Sipas Hotit, besimi i qytetarëve është dëmtuar dhe nuk mund të rikthehet pa një akt të qartë përgjegjësie dhe reformimi të sinqertë.
Në deklaratën e tij, Hoti ka paralajmëruar se nëse lidershipi aktual i LDK-së nuk merr përgjegjësinë që i takon dhe nuk hap rrugën për reformim të thellë, ai do të japë dorëheqje nga organet drejtuese të partisë. Ai ka theksuar se ky nuk është një akt emocional, por një qëndrim parimor në mbrojtje të statutit, standardeve dhe identitetit politik të LDK-së.
Në fund, Hoti ka bërë thirrje që të gjithë ata që kanë përgjegjësi politike në LDK – nga Kryesia, Këshilli i Përgjithshëm, kryetarët e degëve e deri te delegatët e Kuvendit – të kontribuojnë për një proces të rregullt, statutor dhe transparent, në mënyrë që LDK-ja të marrë drejtimin e duhur për të ardhmen.