Nënkryetarja e Komunës së Suharekës, Mihrije Suka Berisha, ka reaguar publikisht pas përfundimit të mandatit të saj të dytë, duke falënderuar qytetarët, bashkëpunëtorët dhe të gjithë ata që e kanë mbështetur gjatë tetë viteve të angazhimit institucional.
Në mesazhin e saj, Berisha ka shprehur mirënjohje të thellë për fjalët pozitive, vlerësimin dhe mbështetjen e marrë nga familjarë, miq, kolegë dhe qytetarë të Komunës së Suharekës, duke e cilësuar këtë periudhë si një rrugëtim të jashtëzakonshëm në shërbim të qytetarëve.
Ajo ka falënderuar në mënyrë të veçantë kryetarin e Komunës së Suharekës, Bali Muharremaj, për besimin e dhënë dhe për mundësinë që të jetë nënkryetarja e parë femër në këtë komunë. Sipas saj, vitet e bashkëpunimit kanë qenë të mbushura me mësime, sfida dhe përvoja që do ta shoqërojnë gjatë gjithë jetës.
Berisha ka shprehur mirënjohje edhe për drejtorët e drejtorive komunale dhe zyrtarët komunalë, duke theksuar profesionalizmin dhe përkushtimin e tyre në çdo proces institucional. Po ashtu, ajo ka falënderuar kryesuesin dhe asambleistët e Kuvendit Komunal nga të gjitha partitë politike, duke vlerësuar rolin e debateve, ideve dhe kritikave në zhvillimin demokratik të komunës.
Një pjesë e veçantë e falënderimeve iu kushtua grave të Komunës së Suharekës, për të cilat Berisha tha se janë gra të forta, të guximshme dhe frymëzuese, me të cilat janë avancuar kauza të rëndësishme dhe është ngritur zëri për barazi e fuqizim.
Ajo ka shprehur respekt të veçantë për familjet e dëshmorëve, organizatat joqeveritare, Policinë e Kosovës, bashkësitë fetare, bizneset, komunitetet dhe mediat, duke theksuar se bashkëpunimi dhe besimi i tyre kanë qenë thelbësore gjatë mandatit të saj.
Në fund, Berisha ka falënderuar bashkëshortin dhe familjen e saj për mbështetjen e vazhdueshme, duke theksuar se përfundimi i angazhimit institucional nuk nënkupton edhe fundin e përkushtimit të saj ndaj Suharekës.
Sipas saj, ajo do të vazhdojë të mbetet aktive dhe mbështetëse e çdo iniciative që i shërben qytetit dhe qytetarëve të Komunës së Suharekës.