Ministri i Bujqësisë, Faton Peci, ka zhvilluar sot një takim të veçantë me bujkun e njohur nga Sopija e Suharekës, Xhemë Beqirajn, të cilin e cilësoi si shembull të punës së palodhshme, përkushtimit dhe patriotizmit.
Në një postim në rrjetet sociale, ministri Peci shkroi:
“Kur je punëtor i madh, pashmangshëm je edhe patriot dhe njeri i mirë. Xhemë kampionit nuk i intereson vetëm leverdia ekonomike, por i vlon delli dhe nefci i shqiptarit patriot. Xhemën dhe shumë Xhema cep më cep Kosovës i falënderoj me përulësi, sepse kanë qenë motivi dhe shtysa ime për të qenë çdo javë afër fermerëve. ✋ Rrofsh, Xhemë kampioni!”
Ministri tha se bujku Xhemë Beqiraj nga Sopija këtë fundjavë ka vendosur të plasojë prodhimet e tij bujqësore për qytetarët e Republikës së Kosovës, për mërgatën dhe për mekanizmat e sigurisë që po e kalojnë ditën në Ujman.
Peci e cilësoi Beqirajn si një figurë që nuk mendon vetëm për përfitimin ekonomik, por edhe si një njeri të lidhur ngushtë me vlerat e patriotizmit dhe dashurisë për vendin.
Ky takim, sipas ministrit, është edhe një mesazh falënderimi për të gjithë fermerët e Kosovës që çdo ditë kontribuojnë me mundin dhe djersën e tyre në zhvillimin e vendit.