Kandidati për kryetar të Suharekës nga radhët e Lëvizjes VETËVENDOSJE!, Hamdi Bytyçi, ka njoftuar sot aderimin e radhës në ekipin e tij: Msc. Veton Ramshaj, një emër i njohur në fushën e inxhinierisë mekanike.
Me përvojë të pasur profesionale dhe një reputacion të ndërtuar mbi aftësi të thella teknike, përkushtim dhe etikë të lartë pune, Ramshaj vjen si një vlerë e shtuar në rrugëtimin politik të Vetëvendosjes në Suharekë. Ai njihet për qasjen e tij të matur, natyrën e qetë dhe seriozitetin në çdo detyrë që merr përsipër, duke sjellë me vete një model të përkushtimit profesional e qytetar.
Sipas Bytyçit, një nga veçoritë më të spikatura të Ramshajt është aftësia për të punuar në grup dhe për të kontribuar ndjeshëm në arritjen e objektivave të përbashkëta. Ai është i përkushtuar ndaj përmirësimit të vazhdueshëm profesional dhe beson në rëndësinë e zhvillimit të qëndrueshëm për komunitetin.
“Fjalë pak, punë shumë – ky është parimi që e përshkruan më së miri Vetonin,” ka deklaruar Bytyçi. “Me energjinë dhe dijen e tij, ai bëhet pjesë e rrugëtimit tonë të përbashkët me familjen e madhe të Lëvizjes VETËVENDOSJE!”
Aderimi i Ramshajt shihet si një hap i rëndësishëm drejt forcimit të komponentës teknike dhe profesionale në përfaqësimin lokal të VV-së, duke sjellë një zë serioz dhe të besueshëm në shërbim të qytetarëve të Suharekës.
