Kryetari i Komunës së Suharekës, Bali Muharremaj, ka prezantuar projektin për stacionin e ri të autobusëve, një hap i madh drejt modernizimit të shërbimeve të transportit publik dhe krijimit të një hapësire të denjë për qytetarët dhe vizitorët.
Në prezantimin e tij, Muharremaj tha se ky stacion është vendi ku nisin udhëtimet dhe ku priten mysafirë e familjarë, prandaj do t’i jepet pamja dhe funksionaliteti që e meriton.
Projekti parasheh:
15 perona për transport lokal dhe 7 për ndërkombëtar
Parking për qytetarë, taksi dhe biçikleta
Park të gjelbër për udhëtarë dhe komunitetin
6+ sportele biletash dhe hapësira pritjeje të klimatizuara
Dhoma të posaçme për nënën dhe fëmijën
Qasje për persona me aftësi të kufizuara
Ky projekt i rëndësishëm synon jo vetëm përmirësimin e kushteve të udhëtimit, por edhe krijimin e një stacioni modern, funksional dhe të qasshëm për të gjithë.
Muharremaj theksoi se së bashku me qytetarët, ky stacion do të marrë pamjen që e meriton, duke u shndërruar në një pikë referimi për Suharekën dhe më gjerë.
