Partia Demokratike e Kosovës ka deklaruar se nuk do të marrë pjesë në mbledhjen e Kryesisë së Kuvendit, që u ftua për ditën e hënë.
Përmes një njoftimi zyrtar, PDK-ja thotë se Kuvendi nuk është ende i konstituuar, prandaj edhe ftesën për mbledhje e konsideron si të pakuptimtë.
“PDK vlerëson se zvarritjet e qëllimshme në procesin e themelimit të institucioneve shtetërore, të shkaktuara nga partia e parë, janë skajshmërisht të rrezikshme për Republikën e Kosovës. Edhe pse nuk kishte detyrim kushtetues apo politik, Partia Demokratike e Kosovës mori mbi vete përgjegjësinë institucionale duke votuar për Kryetarin e Kuvendit, me qëllim të vetëm zhbllokimin e institucionit më të lartë përfaqësues të qytetarëve” thuhet në njoftimin zyrtar të PDK-së.