Një ngjarje e rëndë ka ndodhur në Pejë, ku një polic i trafikut është lënduar pasi është goditur aksidentalisht gjatë ushtrimit të detyrës.

Sipas të dhënave nga vendi i ngjarjes, polici kishte tentuar të ndalonte një veturë në lëvizje. Derisa vetura po ngadalësonte, një automjet ushtarak i KFOR-it e ka goditur atë nga prapa. Nga goditja e fortë, vetura e shtyp policin dhe e përplas atë mbi një kamion të parkuar.

Pjesëtarët e KFOR-it kanë dalë menjëherë nga automjeti dhe janë afruar te vetura e aksidentuar për të ofruar ndihmë.

Megjithatë, ajo që ka ngritur reagime është fakti se polici i lënduar nuk është ndihmuar menjëherë nga kolegu i tij i pranishëm në vendin e ngjarjes, çka ka shkaktuar shqetësim te qytetarët që panë rastin.

Rasti pritet të hetohet në detaje për të sqaruar përgjegjësitë dhe rrethanat e plota të aksidentit.