Talenti i ri nga Suhareka, René Kuqi, ka bërë një hap të madh në karrierën e tij duke u pranuar në Akademinë e Bayern Munich, një ndër akademitë më prestigjioze në futbollin evropian.

Kuqi nisi rrugëtimin e tij futbollistik në moshën 5-vjeçare në Shkollën e Futbollit Suhareka, ku kaloi nëpër të gjitha grupmoshat deri te U-13. Gjatë kësaj periudhe, ai është shpallur portieri më i mirë në të gjitha turnet ku ka marrë pjesë, si në Kosovë ashtu edhe në Shqipëri, duke u vlerësuar për talentin, disiplinën dhe paraqitjet e qëndrueshme.

Pranimi në Akademinë e Bayern Munich konsiderohet një sukses i rëndësishëm për të riun suharekas, i cili tashmë do të zhvillojë tutje karrierën e tij në një ambient profesional me standarde të larta evropiane.

Rrugëtimi i tij vlerësohet si shembull i punës dhe angazhimit të vazhdueshëm, ndërsa pritshmëritë për të ardhmen e tij sportive mbeten të larta.