Suharekë – Kryetari i nëndegës së LDK-së në Shirokë, Bashkim Ndrecaj, ka reaguar pas zjarrit të sotëm në zonën industriale, duke falënderuar zjarrfikësit, kompaninë Famis Co, Agrokosova Holding, Gani Transport, dhjetëra kompani të tjera vendore, qytetarët dhe institucionet komunale për angazhimin e tyre në shmangien e një katastrofe të mundshme.
Në këtë zonë operojnë dhjetëra biznese dhe ndodhet Trafostacioni 110 kVA i KOSTT-it, që shpërndan energji elektrike për Suharekën dhe zonat përreth. Zjarri, i cili dyshohet se është shkaktuar nga një shkëndijë elektrike nga telat e tensionit të lartë, rrezikonte të shkaktonte dëme qindra milionëshe si për bizneset private, ashtu edhe për infrastrukturën energjetike.
Ndrecaj ka theksuar se falë reagimit të shpejtë dhe bashkëpunimit të të gjithëve, situata u vu nën kontroll. Në një video të publikuar nga vendngjarja dëgjohen edhe zhurma të qarkut elektrik, të cilat dyshohet se mund të kenë qenë momenti i shkëndijës që ndezi zjarrin.