Kreu i VV-së, Albin Kurti, i cili është kryeministër në detyrë, ka fajësuar opozitën për mos konstituim të Kuvendit.

Ai po ashtu ka thënë se me qeverisjen e tij ai ua ka ndaluar pasurimin privat e zhvatjen.

Lidhur me këtë, deputeti i PDK-së, Ferat Shala, në një prononcim për Gazeta Blic, ka thënë se nëse Kurti i paka ndalur keqpërdorimet e opozitës, le t’i ndalë edhe ato të ministrave e zyrtarëve të tij, nëse mundesh.

Ai ka thënë që t’i ndalë tregtarët e energjisë, të rezervave shtetërore, vjedhjet në tekste shkollore, ndarje nga 200 mijë euro për familjarë e miliona euro keqpërdorime në aferën e ambalazhuesve të ujit.

“Kryeministër, pasi i paske ndalur keqpërdorimet e opozitës, ndali edhe ministrat dhe zyrtarët e tu, nëse mundesh:
• Ndali tregtarët e energjisë.
• Ndali keqpërdorimet dhe tenderët njëburimorë në Ministrinë e Infrastrukturës, ndërmarrjet publike, KEK, etj.
• Ndali, Kryeministër, tregtarët e rezervave shtetërore.
• Ndali keqpërdorimet e miliona eurove në aferën e ambalazhuesve të ujit.
• Ndali ministrat që ndajnë nga 200 mijë euro për familjarët e vet dhe të deputetëve të tu, Albin.
• Ndali, që ministrat e tu të mos vjedhin në tekstet shkollore, z. Kurti.
• Ndali, që të mos ua lënë pa pasul edhe ushtrisë së Kosovës”, ka thënë Shala.