Shkencëtarët kanë thënë se një variant i ri i Covid-it, që ka “numër jashtëzakonisht të lartë” të mutacioneve, mund të shkaktojë valë të re të sëmundjes duke i shmangur sistemet mbrojtëse të organizmit.
Vetëm dhjetë raste në tri shtete janë konfirmuar përmes sekuencimit të gjenomit, por varianti i ri ka shkaktuar shqetësim serioz te disa hulumtues për shkak të numrit të madh të mutacioneve, që mund ta ndihmojë virusin që ta shmang sistemin imunitar
Varianti B.1.1.529 ka 32 mutacione në proteinën e virusit që shumica e vaksinave e përdorin për ta nxitur sistemin imunitar kundër Covid-it. Mutacionet në këtë proteinë mund të ndikojnë në aftësinë e virusit për t’i prekur qelizat dhe për t’u përhapur, por edhe t’ia vështirësojë punën qelizave imunitare për ta sulmuar virusin.
Ky variant së pari u vërejt në Botsvanë, shtet në pjesën jugore të Afrikës, ku janë shënuar tri raste. Gjashtë raste tjera janë konfirmuar në Afrikën Jugore dhe një në Hong Kong, te një udhëtar që ishte kthyer nga Afrika Jugore, shkruan The Guardian,
Dr. Tom Peacock, virolog në Kolegjin Perandorak të Londrës, tha se “sasia jashtëzakonisht e lartë e mutacioneve sugjeron se ky mund të jetë shqetësim i vërtetë”.
Rastet e para me këtë variant u identifikuan në Botsvanë më 11 nëntor, ndërsa rasti i parë në Afrikën Jugore u regjistrua tri ditë më vonë.