news image

Shoqata “Vraniqi” ka reaguar ashpër ndaj një artikulli të publikuar nga portali “Insajderi” më 7 nëntor 2025, pas orës 18:00, ku flitej për kinse keqpërdorime financiare në riparimet e Lapidarit të Dëshmorëve në fshatin Vraniq.

Në reagim, Shoqata e ka quajtur këtë raportim “dezinformim të paskrupullt elektoral”, duke sqaruar se nuk ka asnjë lidhje me punimet që janë kryer nga Komuna e Suharekës në lapidarin e fshatit.

“Kryesia e fshatit Vraniq ka bërë vetëm heqjen e dheut pranë lapidarit për të krijuar një hapësirë (binë) për programe festive në përvjetorët e dëshmorëve. Kjo nuk ka të bëjë fare me projektin komunal për lapidar,” thuhet në reagim.

Shoqata sqaron më tej se për këtë punim, kryesia e fshatit dhe Shoqata “Vraniqi” janë marrë vesh që shpenzimet prej 400 euro për heqjen e dheut t’i mbulonte Shoqata, përmes pagesës zyrtare bankare ndaj punëkryesit Driton Faik Muqe.

“Kjo pagesë është bërë në mënyrë transparente dhe nuk ka asnjë lidhje me projektin e lapidarit të dëshmorëve. Lajmi i publikuar është i pavërtetë dhe synon të krijojë keqkuptime gjatë fushatës zgjedhore,” thuhet më tej në reagim.

Shoqata “Vraniqi” u ka bërë thirrje anëtarëve të saj dhe qytetarëve që të mos bien pre e lajmeve të rreme dhe manipulimeve politike, duke theksuar se “lapidarët e dëshmorëve janë simbole të shenjta që duhet të mbrohen nga çdo përdorim politik.”

Reagimi është nënshkruar nga Kryetari i Shoqatës “Vraniqi”, Ismet Loshi, më datë 7 nëntor 2025, në Vraniq.