Një incident serioz ka ndodhur në Stacionin Policor të Prizrenit, ku një person i arrestuar nën dyshimin për dhunë në familje ka arritur të largohet nga objektet e policisë për shkak të mungesës së mbikëqyrjes adekuate.

Si pasojë e këtij rasti dhe me dyshimin për shkelje të rënda të procedurave të sigurisë, janë suspenduar për tri ditë tre zyrtarë policorë të Njësisë Reaguese në Prizren.

Sipas raportimeve, të suspenduarit janë rreshteri Bujar Aliu, si mbikëqyrës i njësisë, dhe zyrtarët Fetah Avduti e Edmond Hoti.

Ngjarja ka ndodhur dje rreth orës 16:00, kur i arrestuari – gjatë procedurës zyrtare – ka përfituar nga neglizhenca operative dhe është larguar nga stacioni pa u vërejtur nga zyrtarët përgjegjës.

Rreth 30 minuta më pas, ai është kapur nga njësitë policore derisa tentonte të hynte në një shtëpi në rrugën “Rexhep Kukaj”. Pas arrestimit të dytë, ndaj tij është caktuar masa e ndalimit për 48 orë dhe është dërguar në qendrën e ndalimit.

Autoritetet kanë nisur procedurat disiplinore ndaj zyrtarëve të përfshirë, ndërsa pritet që rasti të trajtohet me prioritet dhe pa tolerancë ndaj neglizhencës profesionale.

📌 Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.