Një nismë historike për arsimin në Komunën e Suharekës ka nisur zyrtarisht.
Drejtoria e Arsimit, në bashkëpunim me Shkollën Digjitale Suharekë, ka lansuar programin e parë të dedikuar për edukimin mbi Inteligjencën Artificiale (AI) në shkollat publike të komunës.

Sipas drejtorit të arsimit, Remzi Bajselmani, çdo shkollë fillore dhe e mesme do të përfshijë në planin mësimor një orë të dedikuar për edukimin mbi Inteligjencën Artificiale.
Kjo nismë synon që nxënësit e Suharekës të njihen me konceptet bazë të teknologjisë moderne dhe të përgatiten për sfidat e së ardhmes.

“Aftësi mbi Inteligjencën Artificiale, në bashkëpunim me Shkollën Digjitale Suharekë, po e nisim një revolucion të arsimit publik në Suharekë.
Çdo shkollë fillore dhe e mesme do të merr një orë edukim në Inteligjencë Artificiale.
Kjo e vendos Suharekën në linjë me zhvillimet moderne teknologjike”, – tha Bajselmani.

Ky program vendos Suharekën në mesin e komunave të para në Kosovë që integrojnë Inteligjencën Artificiale në sistemin arsimor publik, duke e bërë arsimin lokal më të afërt me trendet globale të inovacionit dhe digjitalizimit.