Qytetarët e Suharekës po përballen me mungesë të energjisë elektrike që nga orët e para të mëngjesit të sotëm, ndërsa ndërprerja ka zgjatur rreth 8 orë pa asnjë sqarim të plotë nga furnizuesi.

Banorët raportojnë se linjat telefonike të KESCO-s nuk janë përgjigjur, ndërsa shumë prej tyre ankohen se kanë mbetur krejtësisht të painformuar për situatën.

I vetmi njoftim zyrtar i paraqitur deri tani është ai në aplikacionin e KESCO-s, ku thuhet:

“Ndërprerje të energjisë në daljen ‘J07 Theranda 2-32000026’ prej 18/11/2025, ora 03:57 – arsyeja e ndaljes është: KOSTT.”

Ky njoftim i shkurtër nuk sqaron kohën e rikthimit të energjisë dhe as arsyet teknike të ndërprerjes së zgjatur, duke lënë qytetarët në pasiguri.

Banorët thonë se mungesa e informimit ka krijuar shqetësim, sidomos për bizneset, familjet me pajisje të domosdoshme elektrike dhe shkollat në zonë.

Për momentin nuk ka informata nëse ndërprerja do të vazhdojë dhe asnjë deklarim nga KESCO apo KOSTT nuk është dhënë për media.

SuharekaExpress do të raportojë për çdo zhvillim të ri.