Suhareka po bëhet gati të pasurohet me një tjetër projekt madhor dhe tejet të veçantë, i cili do të ndikojë drejtpërdrejt në jetën e sportistëve, fëmijëve dhe komunitetit në tërësi. Bëhet fjalë për ndërtimin e një pishine gjysmëolimpike moderne, që pritet të jetë ndër më të kompletuarat në rajon.
Kryetari i Komunës së Suharekës, Bali Muharremaj, ka prezantuar projektin ambicioz duke theksuar se puna nuk ndalet dhe se vizioni i tij është të krijohen hapësira moderne e funksionale për qytetarët.
“Puna nuk ndalet, sepse shërbimi për qytetarët është motivi ynë,” – ka deklaruar Muharremaj, duke shtuar se ky investim është një dëshmi e përkushtimit për brezat e rinj dhe zhvillimin sportiv në Suharekë.
4000 m² për sportistë dhe fëmijë
Kompleksi i ri do të shtrihet në një sipërfaqe prej 4000 metrash katrorë dhe do të përmbajë dy pishina:
Një pishinë për sportistët dhe garat, që do të mundësojë zhvillimin e disiplinave profesionale të notit dhe aktiviteteve konkurruese.
Një pishinë për fëmijët, ku ata do të mësojnë hapat e parë në not dhe do të marrin pjesë në aktivitete edukative dhe argëtuese.
Ky kombinim i hapësirave sportive dhe edukative synon jo vetëm rritjen e cilësisë së sportit në Suharekë, por edhe edukimin e fëmijëve e të rinjve për një jetë më aktive dhe të shëndetshme.
Përveç që do të ofrojë kushte moderne për sportistët profesionistë, projekti pritet të ketë ndikim të madh në komunitet. Ai do të shërbejë si qendër trajnimi, edukimi dhe argëtimi, duke e vendosur Suharekën në një nivel të ri në fushën e infrastrukturës sportive.
Ky është vetëm njëri nga projektet që po e ndryshojnë imazhin e qytetit dhe po i japin përparësi zhvillimit të gjeneratave të reja.
Videoja e publikuar nga kryetari Muharremaj, ku shihen detajet e projektit:
Ky investim është një tjetër dëshmi se Suhareka po konsolidohet si një qytet i sportit, i rinisë dhe i ideve vizionare