Kandidati për kryetar të Komunës së Suharekës nga Lidhja Demokratike e Kosovës, Dr. Ardian Shala, ka prezantuar zyrtarisht Urim Sukën si kandidatin me nr. 4 në listën e LDK-së për Asamblenë Komunale, në zgjedhjet e 12 tetorit.
Dr. Shala e ka vlerësuar Sukën si një figurë kyçe të LDK-së në Suharekë, me tri diploma universitare, përvojë të gjatë si drejtor dhe mësimdhënës që nga viti 2002, si dhe rol të spikatur si shef i grupit të asambleistëve të LDK-së gjatë mandatit të kaluar. Ai theksoi se Suka është një zë i përgjegjshëm dhe i guximshëm në mbrojtjen e interesave të qytetarëve.
Pas prezantimit të bërë nga Shala, edhe vetë Urim Suka është prononcuar publikisht duke shprehur mirënjohjen për besimin e dhënë nga strukturat e partisë dhe duke kërkuar përkrahjen e qytetarëve për një mandat të ri.
Në deklaratën e tij, Suka kujtoi katër vitet e angazhimit të tij në Kuvendin Komunal si përfaqësues i qytetarëve, duke theksuar përkushtimin, përgjegjësinë dhe vendosmërinë për të mbrojtur interesin publik. Ai premtoi se do të vazhdojë të jetë një adresë e hapur për secilin shqetësim dhe një zë i fuqishëm për një Therandë më të drejtë, më të zhvilluar dhe më demokratike.
“Unë jam gati për të bërë më të mirën për ju, unë jam gati që të vazhdoj të jem zëri juaj në Kuvendin e Komunës,” tha Suka, duke ftuar qytetarët ta mbështesin më 12 tetor.
