Kryetari Bali Muharremaj ka prezantuar Visar Berishën, një emër të njohur dhe të respektuar në sportin kosovar, si kandidat për Asamblenë Komunale të Suharekës nga radhët e AAK-së.
Ish-kapiteni i FC Ballkanit ka një karrierë të ndritur, ku në vitin 2008 u shpall Futbollisti më i mirë në Kosovë, ndërsa Komuna e Suharekës e ka nderuar tri herë me çmimin “Sportisti i Vitit”. Ai është vlerësuar edhe nga Komuna e Prishtinës si Sportisti më i mirë, duke dëshmuar vlerat dhe kontributin e tij në arenën sportive.
Visari ka mbrojtur me dinjitet ngjyrat e klubeve të njohura, duke nisur nga FC Ballkani, e më pas Prishtina, Liria, Drenica, si dhe klubet evropiane Winterthur dhe Schaffhausen në Zvicër.
Pas përfundimit të karrierës aktive, ai vendos të sjellë përvojën, disiplinën dhe lidershipin e tij në politikën lokale, me synimin për të qenë zëri i qytetarëve dhe për të kontribuar në zhvillimin e komunës.
Visar Berisha shihet si një shembull se si pasioni dhe përkushtimi në sport mund të kthehen në energji pozitive për shërbimin publik.
