Futbollisti Xherdan Shaqiri ka folur me entuziazëm për gjasat e Kosovës dhe Shqipërisë në garën për kualifikim në Kupën e Botës, duke vlerësuar progresin që kanë bërë të dy kombëtaret.

Në një intervistë për Watson.ch, Shaqiri tha se formati i ri i Botërorit u jep më shumë mundësi ekipeve të vogla të realizojnë ëndrrën e pjesëmarrjes.

“Ka kombëtare që po garojnë për herë të parë dhe është mirë që kanë më shumë gjasa. Shqipëria dhe Kosova ende mund të kualifikohen përmes play-off-it,” u shpreh ai.

Shaqiri theksoi se kualifikimi i Kosovës në Botëror do të ishte moment historik.

“Do të ishte një histori e jashtëzakonshme. Turneu i tyre i parë. Vetë fakti që janë ende në garë tregon progresin e madh që kanë bërë,” tha ai, duke shtuar se gjithnjë e më shumë lojtarë cilësorë po zgjedhin fanellën e Kosovës, gjë që e ka rritur nivelin dhe besimin e ekipit.

Ylli i Zvicrës foli edhe për marrëdhënien e tij me presidentin e FIFA-s, Gianni Infantino, duke zbuluar se janë njohur rastësisht në një fluturim drejt Londrës dhe që prej asaj kohe kanë mbetur në kontakt.

“Kohët e fundit mori një çmim në Kosovë dhe unë e urova,” tha Shaqiri.

Shaqiri mbetet optimist se me vazhdimësinë e progresit, Kosova mund ta realizojë ëndrrën e madhe të paraqitjes në Kupën e Botës.