Kryeministri i Kosovës, Albin Kurti, sot, më 23.02.2025, pritet ta takojë kryetarin e Lidhjes Demokratike të Kosovës (LDK), Lumir Abdixhiku. Takimi është paraparë të mbahet në hapësirat e Kuvendit, konfirmoi zëdhënësi i Qeverisë së Kosovës, Perparim Kryeziu.
“Kryeministri Kurti takon sot kryetarin e LDK-së, Abdixhiku në orën 14:00 në hapësirat e Kuvendit”- konfirmoi shkurt Kryeziu për KALLXO.com.
Se kryeministri do ta presë në takim kreun e LDK-së e konfirmoi mbrëmë, më 22.02.2025, vetë Qeveria e Kosovës, pasi paraprakisht kishte njoftuar për takimin që Kurti kishte zhvilluar me kryetarin e Partisë Demokratike të Kosovës (PDK), Bedri Hamza.
Këto takime po realizohen vetëm nëntë ditë para përfundimit të afateve kushtetuese për çështjen e zgjedhjes së presidentit.
Qeveria e Kosovës, pas takimit që kryeministri Kurti pati me Hamzën, njoftoi se temë e veçantë e bisedës ishte pikërisht zgjedhja e presidentit.
Pas takimit, Hamza deklaroi se PDK-ja nuk është pengesë e proceseve shtetërore, por nuk do të mbështesë kandidatura që, sipas tij, nuk përfaqësojnë unitetin qytetar.
Në anën tjetër, kryetari i LDK-së, Lumir Abdixhiku, para katër ditësh tha se nuk kanë pasur asnjë komunikim me Lëvizja Vetëvendosje për çështjen e zgjedhjes së presidentit të Kosovës, proces që pritet të zhvillohet në muajin mars.
“Nuk kemi pasur asnjë lloj komunikimi, as për Qeveri e, besa, as për president, me Lëvizjen Vetëvendosje”, deklaroi ai në emisionin “Debat Plus” në RTV Dukagjini.
Abdixhiku tha se pret një takim me të gjitha partitë politike për këtë çështje, duke theksuar se LDK do ta mbajë pozicionin e vet politik. Ai nuk tregoi nëse do të votojnë apo do të jenë pjesë e seancës për zgjedhjen e presidentit nëse kandidate do të jetë presidentja aktuale, Vjosa Osmani.
Mandati i presidentes përfundon në prill të vitit 2026. Ajo e nisi detyrën më 4 prill 2021, kur u zgjodh nga Kuvendi i Kosovës me 71 vota për, nga 82 deputetë pjesëmarrës në votim.
Si presidentja e dytë grua në historinë e Kosovës dhe e gjashta në radhën e krerëve të shtetit që nga paslufta, Osmani synon vazhdimësinë në krye të institucionit.
Sipas Kushtetutës, presidenti i Kosovës zgjidhet me dy të tretat e votave të 120 deputetëve në dy raundet e para. Nëse kjo shumicë nuk arrihet, në raundin e tretë pragu ulet në 61 vota.