Në prag të afatit kushtetues për presidentin, opozita kërkon dialog ndërpartiak
Teksa më 4 mars përfundon afati kushtetues për zgjedhjen e presidentit apo presidentes nga Kuvendi i Kosovës, partitë opozitare po theksojnë nevojën për dialog ndërpartiak, ndërsa paralajmërohet se dështimi për të zgjedhur kreun e shtetit mund ta çojë vendin në zgjedhje të reja.
Aktualisht nuk ka një kandidat zyrtar për postin e presidentit, ndërkohë që opozita ka bërë të ditur se vota e saj do të varet nga arritja e një konsensusi të gjerë politik. Përfaqësues të partive opozitare kanë kërkuar që figura e presidentit të jetë mbipartiake dhe unifikuese.
Deputeti i PDK-së, Artan Behrami, ka deklaruar se deri tani nuk ka pasur ndonjë takim serioz për diskutimin e emrit të presidentit, por pret që takime të tilla të ndodhin në ditët në vijim.
“Pozicioni i PDK-së është i qartë. Zgjedhja e presidentit duhet të ndodhë përmes dialogut ndërpartiak, sepse figura e presidentit duhet të jetë mbipartiake dhe të përfaqësojë unitetin e qytetarëve të Republikës së Kosovës”, ka thënë Behrami.
Ai shtoi se deri më tani nuk kanë pranuar ftesë nga Lëvizja Vetëvendosje për diskutim, por në rast të një ftese, kryetari i PDK-së, Bedri Hamza, do të marrë pjesë në takime.
Nga ana tjetër, deputetja e AAK-së, Albana Bytyqi, ka theksuar se përkundër faktit që presidentja Vjosa Osmani ka përfaqësuar vendin si grua në mënyrë të mirë, sipas saj nevojitet një figurë më unifikuese.
“Po kërkojmë një president që të jetë unifikues”, ka deklaruar Bytyqi, duke shtuar se AAK-ja ka dërguar ftesa për nënshkrime tek partitë opozitare për një kandidat të përbashkët, por nuk ka marrë përgjigje konkrete.
Sipas saj, deri më tani as AAK nuk ka marrë ftesë nga LVV për diskutim rreth zgjedhjes së presidentit.
Zhvillimet e ditëve në vijim pritet të jenë vendimtare, pasi për zgjedhjen e presidentit nevojitet pjesëmarrja e të paktën 80 deputetëve në sallë, ndërsa në mungesë të konsensusit politik, vendi rrezikon të përballet me zgjedhje të reja.