Suhareka Express: Zonja Muqa, na tregoni pak për veten tuaj dhe përvojën tuaj profesionale?
Elvana Muqa: Jam e lindur në Prizren, ku kam përfunduar shkollën fillore, të mesmen dhe Fakultetin e Edukimit. Jam e kualifikuar si asistente për fëmijë me nevoja të veçanta arsimore me diplomën “Pearson” dhe gjithashtu kam kryer trajnimin profesional si terapiste ABA në Tiranë. Jam e kualifikuar edhe si këshilltare karriere nga Ministria e Arsimit. Aktualisht punoj si këshilltare karriere në Shkollën Fillore “Destan Bajraktari” në Suharekë. Jam magjistre e diplomuar në Psikologji të Edukimit dhe për më shumë se një dekadë menaxhoj edhe biznesin familjar. Jam e martuar dhe jetoj në Vraniq.
Suhareka Express: Çfarë ju shtyu që të hyni në politikë dhe të kandidoni për Asamblenë Komunale?
Elvana Muqa: Unë kam qenë gjithmonë e lidhur ngushtë me komunitetin tim, duke punuar me të rinjtë, me fëmijët me nevoja të veçanta dhe me familjet. E pashë si detyrë që ta çoj këtë përvojë edhe më tej, në vendimmarrje, aty ku mund të ndikoj drejtpërdrejt për të sjellë ndryshime konkrete. Të qenit pjesë e politikës për mua nuk është thjesht garë, por një mundësi për të dhënë kontribut të drejtpërdrejtë për qytetarët e Suharekës.
Suhareka Express: Cilat janë prioritetet tuaja kryesore si kandidate për Asamblenë Komunale?
Elvana Muqa: Prioriteti im i parë është përkujdesja dhe mbështetja për personat me nevoja të veçanta – që ata të kenë kushte të barabarta në arsim, shëndetësi dhe punësim. Po ashtu, dua të angazhohem për fuqizimin e të rinjve dhe grave në procesin e vendimmarrjes, sepse besoj se zëri i tyre duhet të dëgjohet më shumë. Një tjetër prioritet i imi është mbështetja e arsimit cilësor, zhvillimi i shërbimeve publike dhe përmirësimi i infrastrukturës.
Suhareka Express: Si e shihni bashkëpunimin me institucionet lokale në këtë drejtim?
Elvana Muqa: Nën udhëheqjen e kryetarit Bali Muharremaj janë realizuar projekte që kanë ndikuar drejtpërdrejt në jetën e qytetarëve. Përvoja ime si këshilltare karriere më ka treguar se bashkëpunimi i institucioneve me qytetarët është çelësi i suksesit, dhe këtë e kam parë nga afër gjatë këtij mandati. Për këtë arsye, besoj se duhet vazhduar puna e nisur, me përkushtim dhe me vizion afatgjatë.
Suhareka Express: Si po ecën fushata juaj dhe çfarë përshtypjesh po merrni nga qytetarët?
Elvana Muqa: Fushata po ecën shumë mirë dhe në mënyrë të qetë. Ajo që po e bën edhe më të veçantë është kultura e lartë demokratike që po tregojnë qytetarët tanë. Ka një interes të madh, ka mbështetje dhe mbi të gjitha një gatishmëri për dialog dhe për bashkëpunim. Kjo është një shenjë e qartë se Suhareka po ecën drejt një demokracie më të pjekur.
Suhareka Express: Faleminderit për kohën dhe intervistën.
Elvana Muqa: Faleminderit juve për hapësirën!
