Suhareka Express zhvilloi një intervistë me Naim Belulin nga Mushtishti, biolog me përvojë në aktivitete mjedisore dhe shoqërore, kandidat i Aleancës për Ardhmërinë e Kosovës (AAK) për Asamblenë Komunale të Suharekës. Ai garon me numrin 16 në listë dhe synon të përfaqësojë qytetarët me ndershmëri dhe përgjegjësi.
Suhareka Express: Z. Beluli, na tregoni pak më shumë për veten tuaj dhe rrugën që ju solli deri te kandidatura për Asamblenë Komunale?
Naim Beluli: Unë vij nga Mushtishti dhe me profesion jam biolog. Gjatë viteve kam qenë i përfshirë në aktivitete të ndryshme publike e shoqërore. Kam drejtuar grupe ambientalistësh, duke mbjellë çdo vit lule dhe fidane të ndryshme në ambientet e jashtme të shkollave – një projekt me nxënës, i financuar nga JICA (Organizata e Qeverisë së Japonisë). Po ashtu, kam shënuar suksese në gara komunale në degën e biologjisë. Kandidatura ime është propozuar nga nëndega e AAK-së në Mushtisht dhe është mbështetur fuqishëm nga kryetari i Komunës, z. Bali Muharremaj. Për mua, ky besim është një nder dhe një përgjegjësi e madhe.
Suhareka Express: Cilat janë prioritetet tuaja kryesore nëse fitoni mandatin si asambleist?
Naim Beluli: Çdo banor ka të drejtë t’i gëzojë të drejtat universale të njeriut – banim, ushqim, veshmbathje dhe shkollim. Këto janë baza mbi të cilat dua të ndërtoj angazhimin tim politik. Synimi im është të përfaqësoj qytetarët me ndershmëri dhe përgjegjësi. Do të fokusohem në tri fusha që prekin drejtpërdrejt jetën e tyre: arsimi bashkëkohor, mjedisi i pastër dhe ndriçimi i rrugëve publike. Besoj se investimi në këto fusha rrit cilësinë e jetës dhe krijon një perspektivë më të mirë për të gjithë.
Suhareka Express: Çfarë nënkuptoni me “arsim bashkëkohor” dhe pse e shihni si prioritet?
Naim Beluli: Arsimi është themeli i zhvillimit. Për arsimin bashkëkohor nënkuptoj përmirësimin e kushteve të shkollave, trajnimin e mësimdhënësve dhe futjen e metodave moderne të mësimdhënies. Fëmijët tanë duhet të mësojnë në një ambient të denjë, me mjete didaktike bashkëkohore, që t’i përgatisin për sfidat e së ardhmes.
Suhareka Express: Mjedisi i pastër shpesh mbetet sfidë në shumë komuna. Si do të angazhoheni në këtë drejtim?
Naim Beluli: Si biolog, mjedisi është një fushë që më prek personalisht. Do të punoj për projekte të menaxhimit të mbeturinave, gjelbërimit të hapësirave publike dhe edukimit të brezit të ri për rëndësinë e ruajtjes së natyrës. Një qytet i pastër është jo vetëm më i bukur, por edhe më i shëndetshëm.
Suhareka Express: Një tjetër pikë që e përmendët është ndriçimi publik. Pse e konsideroni të rëndësishëm?
Naim Beluli: Sepse ndriçimi i rrugëve publike ndikon direkt në sigurinë dhe jetën e përditshme të qytetarëve. Një rrugë e ndriçuar është më e sigurt për fëmijët, për të rinjtë dhe për të moshuarit. Është një çështje që duket e vogël në pamje të parë, por ka ndikim të madh praktik.
Suhareka Express: Keni përmendur shpesh mbështetjen e kryetarit të Komunës, z. Bali Muharremaj. Si e shihni këtë përkrahje?
Naim Beluli: Kryetari Bali Muharremaj është shembull i një udhëheqësi që punon me përkushtim për qytetin tonë. Ai ka treguar se si një qeverisje e afërt me qytetarin sjell rezultate konkrete. Mbështetja e tij për kandidaturën time më jep motivim dhe energji shtesë për të vazhduar rrugën e përfaqësimit të ndershëm.
Suhareka Express: Çfarë mesazhi keni për qytetarët e Suharekës?
Naim Beluli: Të jem përfaqësues i qytetarëve të Suharekës është një nder i madh. Kërkoj besimin e tyre me votë, sepse vetëm së bashku mund t’i kthejmë prioritetet aty ku duhet: te qytetari. Premtoj se do të punoj me energji e përkushtim të plotë, gjithmonë në shërbim të interesit publik.
Faleminderit Diasporës!
Dëshiroj të shpreh mirënjohjen time të thellë për gjithë bashkatdhetarët tanë në Diasporë për mbështetjen e çmuar që po i japin kandidaturës sime për Asamblenë Komunale në Suharekë. Kontributi juaj është një dëshmi e lidhjes së fortë me vendlindjen dhe dëshirës për të ndikuar pozitivisht në zhvillimin e komunës sonë.
Mbështetja juaj jo vetëm forcon kandidimin tim, por gjithashtu fuqizon komunitetin tonë dhe shpresën për një të ardhme më të mirë për Suharekën. Ju falënderoj nga zemra për përkushtimin dhe angazhimin tuaj!
