Juristi dhe prokurori me përvojë të gjatë në sistemin e drejtësisë, Arian Gashi, me origjinë nga Suhareka, është zgjedhur sot Kryetar i Këshillit Prokurorial të Kosovës (KPK).
Gashi njihet si një profesionist me një karrierë të gjatë në institucionet e drejtësisë në Kosovë dhe me përvojë në trajtimin e rasteve të krimeve të rënda, krimeve ekonomike dhe luftën kundër korrupsionit.
Ai ka qenë anëtar i Këshillit Prokurorial të Kosovës nga radhët e Prokurorisë së Apelit, ndërsa gjatë viteve të fundit ka ushtruar edhe funksione të rëndësishme brenda këtij institucioni, përfshirë kryesimin e Komisionit për Mbikëqyrjen e Lëndëve të Korrupsionit dhe Krimeve Ekonomike, si dhe kryetar i Komisionit për Çështje Normative të KPK-së.
Në karrierën e tij profesionale, Gashi ka shërbyer si prokuror në Departamentin për Krime të Rënda në Prokurorinë e Apelit në Prishtinë (2021–2025), ndërsa më herët ka qenë prokuror edhe në Prokurorinë Themelore në Prishtinë (2016–2021) dhe në Prokurorinë Themelore në Gjakovë (2012–2016).
Ai është prokuror i përhershëm i shtetit, i dekretuar në vitin 2015 nga Presidentja e atëhershme e Kosovës, Atifete Jahjaga.
Karrierën e tij në sistemin e drejtësisë e ka filluar edhe më herët në institucione të ndryshme, duke përfshirë EULEX-in si këshilltar ligjor i gjyqtarëve, si dhe në institucione të tjera të drejtësisë dhe administratës publike në Kosovë.
Arian Gashi është nga Suhareka, ku edhe ka pasur angazhime në fillimet e karrierës së tij, përfshirë punën si mësimdhënës i lëndëve juridike në Shkollën e Mesme të Ulët në Suharekë.
Sa i përket formimit akademik, ai ka përfunduar Fakultetin Juridik në Universitetin e Prishtinës, ka kaluar provimin e jurisprudencës, ndërsa ka kryer edhe studimet Master në të Drejtën Amerikane (LL.M.) në Wake Forest University në Karolinën e Veriut në SHBA. Gjithashtu ka përfunduar edhe studimet master në drejtimin juridiko-civil në Universitetin e Prishtinës.
Përveç angazhimeve në sistemin prokurorial, Gashi ka qenë i përfshirë edhe në aktivitete akademike dhe profesionale, duke shërbyer si ligjërues i lëndëve juridike dhe trajner në Akademinë e Drejtësisë, ku ka trajnuar profesionistë të rinj të drejtësisë në fusha të ndryshme të procedurës penale dhe hetimeve financiare.
Po ashtu, ai ka marrë pjesë në një numër të madh trajnimesh dhe programesh profesionale vendore dhe ndërkombëtare, të organizuara nga institucione si OSBE, USAID, OPDAT, Ambasada Amerikane, EULEX dhe organizata të tjera ndërkombëtare, duke u specializuar në fusha si lufta kundër korrupsionit, krimi i organizuar dhe hetimet financiare.
Zgjedhja e tij në krye të Këshillit Prokurorial të Kosovës konsiderohet një arritje e rëndësishme edhe për qytetin e Suharekës, nga ku ai vjen, ndërsa pritet që në këtë pozitë të kontribuojë në forcimin e sistemit prokurorial dhe sundimin e ligjit në vend.