Sot, në selinë qendrore të Lidhjes Demokratike të Kosovës (LDK) në Prishtinë, Kryesia e partisë ka zyrtarizuar kandidaturën e Dr. Ardian Shalës për kryetar të Komunës së Suharekës. Kjo kandidaturë shënon një përpjekje të re të LDK-së për të rikthyer qeverisjen lokale në Therandë, duke u mbështetur në një profil të njohur dhe me përvojë në shërbim publik dhe profesionin mjekësor.
Kush është Ardian Shala?
Dr. Ardian Shala është lindur në fshatin Mushtishtë, në komunën e Suharekës. Ai ka përfunduar studimet për mjekësi në Universitetin e Prishtinës dhe është specializuar në fushën e kardiologjisë. Aktualisht, ai punon si kardiolog në Spitalin Rajonal të Prizrenit dhe njëkohësisht ushtron profesionin edhe në klinikën e tij private.
Në periudhën 2008–2010, gjatë qeverisjes së ish-kryetarit Sali Asllanaj, Shala ka udhëhequr me Drejtorinë e Shëndetësisë në Komunën e Suharekës, ku fitoi përvojë të drejtpërdrejtë në administratën komunale.
Ai është aktualisht kryetar i degës së LDK-së në Suharekë dhe ka një angazhim të gjatë në jetën politike të vendit. Në vitin 2019, u zgjodh deputet në Kuvendin e Kosovës, ndërsa kishte garuar për këtë pozitë edhe në zgjedhjet parlamentare të viteve 2014, 2021 dhe 2025, por pa arritur të sigurojë një ulëse.
Shala ka kandiduar për kryetar të Komunës së Suharekës edhe në zgjedhjet lokale të vitit 2021, ku u mposht nga kryetari aktual, Bali Muharremaj. Gjatë asaj fushate, ai u paraqit me një program të detajuar qeverisës, duke u zotuar për reformë dhe zhvillim në të gjitha sektorët jetikë të komunës.
Deklaratat dhe vizioni politik i Shalës
Gjatë fushatës së vitit 2021, Ardian Shala kishte deklaruar:
“I ri në moshë, me energji të reja, me potencial të ri – të gjitha kapacitetet i kemi. Me ekip të mirë, dhe me këtë do të arrijmë që të zbatojmë pikë për pikë programin tonë për katër vite qeverisje, duke filluar nga arsimi, shëndetësia, infrastruktura, zhvillimi ekonomik, administrata, bujqësia, rinia, kultura dhe sporti.”
Programi i tij ishte i ndarë në shtatë shtylla kryesore:
- Shëndetësia
- Planifikimi dhe zhvillimi ekonomik
- Infrastruktura dhe shërbimet publike
- Arsimi
- Administrata publike
- Bujqësia
- Rinia, kultura dhe sporti
Në një intervistë të vitit 2020 për Suhareka Express, Shala ishte kritik ndaj qeverisjes së AAK-së në komunë. Sa i përket projektit për ndërtimin e sheshit të qytetit, ai kishte deklaruar:
“Ideja për sheshin në Therandë është e kahershme, por çdo gjë tjetër pos idesë ka qenë, është dhe do të jetë dështim të cilin shtrenjtë do ta paguajnë qytetarët e Komunës sonë. Ky ka qenë një projekt mbushje xhepash për militantët e AAK-së dhe dëmtim serioz i bizneseve të qendrës së qytetit.”
Ndërsa për sistemin arsimor, ai ishte shprehur:
“Punësimet në sektorin e arsimit, bazuar në kriterin e vetëm që ka AAK-ja në Therandë – atë të përkatësisë partiake – kanë shkaktuar dëme të pariparueshme në sistemin arsimor. Pasojat e këtij keqmenaxhimi do të ndjehen nga gjenerata të tëra.”
Në të njëjtën intervistë, ai kishte përmendur se marrëdhëniet me kolegët nga partitë opozitare ishin të mira dhe se qëllimi i përbashkët ishte “çkapja e Komunës nga klani i ngushtë i z. Muharremaj”.
Me këtë zyrtarizim nga LDK-ja, Ardian Shala hyn zyrtarisht në garën për Komunën e Suharekës, një garë që pritet të jetë e ashpër dhe vendimtare për drejtimin e ardhshëm të qytetit. Me një profil profesional të fuqishëm dhe përvojë politike, ai shihet si një prej pretendentëve seriozë për të udhëhequr Suharekën në mandatin e ardhshëm.