🇺🇸 Nga Amerika në Asamblenë Komunale të Suharekës: Mr. sc. Brahim Brahimaj, zëri i dinjitetit dhe kujtesës historike
Skenës politike në Suharekë i është shtuar një emër i veçantë – Mr. sc. Brahim Mujë Brahimaj, i cili nga jeta akademike dhe profesionale në Shtetet e Bashkuara të Amerikës, ka vendosur t’i bashkohet garës për Asamblenë Komunale të Suharekës, nga radhët e Partisë GUXO.
Brahimaj vjen nga një familje që historia nuk e kurseu, por që asnjëherë nuk u përkul. Babai i tij, Mujë Brahimaj, ishte dëshmitar i shtypjes së egër të shqiptarëve në vitet ’50, ’60 dhe ’70 – një realitet që e detyroi të largohej drejt Amerikës, duke e mbajtur gjithmonë Kosovën në zemër. Në vitet e ’90-ta, familja Brahimaj kontribuoi pa kursim në përpjekjet për çlirim – me protestë, përkrahje dhe gjak: dhanë më të shtrenjtin, Ragipin, i cili ra dëshmor për lirinë e vendit.
Sot, Mr. sc. Brahim Brahimaj kthehet jo për të kërkuar poste apo privilegje, por për të sjellë dijen, integritetin dhe përvojën në shërbim të qytetarëve. Ai përfaqëson një bashkim të ndershmërisë mërgimtare me angazhimin vendës, një shembull se si diaspora mund të japë kontribut të drejtpërdrejtë në rikthimin e dinjitetit dhe transparencës në vendimmarrje.
Aderimi i tij në GUXO është konsideruar një kthim moral dhe kombëtar, dhe është bërë në prani të figurave të larta shtetërore: Zëvendëskryeministrja dhe Ministrja e Jashtme, Donika Gërvalla-Schwarz, Zëvendësministri i Punëve të Brendshme, Blerim Gashani, si dhe deputetja Albena Reshitaj, e cila u lidh online nga Zvicra.
Takimin e drejtoi Dr. sc. Astrit Sahitaj, kryetar i GUXO – Suharekë, i cili theksoi me vendosmëri:
“Kur i ndershmi guxon, rrëzohen të korruptuarit!”
Kandidatura e Brahimajt për Asamblenë Komunale shihet si një shtyllë e re për moralin publik në Suharekë – një përfaqësim që nuk ndërtohet mbi fjalë, por mbi sakrificë, përkushtim dhe memorie kolektive.
